Да 110-годдзя з дня нараджэння таленавітага беларускага паэта Аркадзя Куляшова ў гарадской бібліятэцы №8 імя Еўфрасінні Полацкай арганізавана кніжна-ілюстратыўная выстаўка “Золата паэзіі Аркадзя Куляшова”.
Аркадзь Куляшоў – яркі прадстаўнік беларускай паэзіі ХХ стагоддзя. Яго талент стаіць побач з талентамі Янкі Купалы і Якуба Коласа. На выстаўцы прадстаўлены ілюстрацыі і кнігі з аўтабіяграфічнымі звесткамі жыцця народнага паэта: сям’я, маленства, вучоба, служба ў арміі, ваенныя гады, сябры, першыя пачуцці да дзяўчыны Алесі, якія Аркадзь Куляшоў пранёс праз усё жыццё і песню “Алеся” у выкананні ансамбля “Песняры”.
Увазе чытачоў прадстаўлены першы верш паэта, надрукаваны ў 1926 годзе ў клімавіцкай акруговай газеце “Наш працаўнік”, калі Аркадзю Куляшову было 12 гадоў, цудоўныя лірычныя творы: паэмы “Крыўда”, “Простыя людзі”, “Далёка ад акіяна”, “Варшаўскі шлях”, цыкл вершаў і паэм, аб’яднаных пад назвай “Маналог”, яркія творы куляшоўскай паэзіі перыяду вайны: “Балада аб чатырох заложніках”, “Над брацкай магілай”, “Ліст з палону”, “Балада аб знойдзенай падкове”, “Камсамольскі білет” і вяршыня ваеннай творчасці пра Беларусь і вайну – паэма “Сцяг брыгады”.
Кніжна-ілюстратыўная выстаўка “Золата паэзіі Аркадзя Куляшова” для ўсіх, хто наталяе прагу сваёй душы з крыніц паэзіі. І хоць куляшоўская паэзія стала ўжо класікай, яна не толькі гісторыя нашай літаратуры, яна сугучна нашаму часу, бо як мысліцель ён абганяў свой час.
